يوميات مواطن أردني مرفوع - فقط في الأردن

و بنرجع بنقول مرحبـآ يا أيها الناس .. كيفكم؟ أنا مش غشيم عن الحال فما حد يقولي عال العال .. أصلا مش عارف ليش اسأل هالسؤال وأنا هو المواطن (مكسور الحال – أنا ذو الدخل المهدود) .. عرفتوني صح؟ قبل هيك اجيتكم بمشوار اسمه "وطني الأردن بحبك .. بس" بس شو؟؟ اكيد عرفتو بس شو ..

واليوم يا حبايب قلبي يا أردنيين جاييكم حضرتي أنا المواطن المرفوع بالعالي وكما غنى السيد فلان والمطرب علنتان والكثيرون ممن لهم الفضل على الوطن في الألحان والغناء وكما قالوا في ألحانهم  (أرفع راسك فوق – انت أردني) .. اليوم انا بدي اقوللهم ما تخافو حبايبي احنا قاعدين بنرتفع الله وكيلكم .. كل يوم والوطن برتفع للأعلى ولم يجد سقف ليرتطم به إلا مؤخرة المواطن .. فقد بات ارتفاع الوطن  "خوازيق تتلوها الخوازيق " ومن كثر ما ارتفعنا ما حد قادر يلحقنا ..

حبيبي يا أردن .. مش عارف كيف بدي أشكرك .. أنت كل يوم بترفعني أكثر وأكثر .. لدرجة اني من كثر ارتفاعي على خازوق فاتورة الكهرباء صار مكسور علي فاتورتين .. ومن كثر ما أنا مرفوع على خازوق الضرائب وبحس انه راتبي الي أصلا مش مكفيني ما عاد موجود وكأني بشتغل فبلاش طول الشهر .. ومن كثر ارتفاع خازوق البنزين الحمد لله ما عندي سيارة وبطلت أجيبها .. ويا حبيب لو تعرف شو الخازوق الي قاعد بستناه منك كمان مرة يا  وطني الغالي .. مش سمعت انهم قاعدين بعملو دراسة لرفع أسعار النقل كماااان مرة ..

يا حبيبي يا أردن مش عارف كيف بدي أشكرك ولا عارف كيف بدي احكيلك عن الحال الي أنا فيها .. وبهذا التناسب العجيب الي ما هو معروف طردي أو عكسي .. بنجد بأنه المواطن رغم ارتفاعه على كل هذه الخوازيق إلا أنه "بات بأسفل السافلين"  والحمد لله رب العالمين .. وبتجد يا عزيزي الوطن إنه الناس المفروض عزيزة في بلادها إلا موطنك صار "ذليل في بلده"  ..

والمستثمر بالقطاع الخاص بيغار منك يا حبيبي انت بترفع المواطن ع خازوق وهو برفع الموظف على خازوق أكبر .. فالحمد لله يعني الراتب زي ما هو رغم كل الارتفاعات والبهدلة وقلة القيمة للموظف الي مش لاقي مين يجيب حقه .. وفوق هيك لو انك يا بلدي  متابع احوال الموظفين كل يوم خصومات وكل يوم بهدلات باسم القوانين الداخلية بالشركات .. الي ما بتعمل باشي اسمه قانون عمل ... وكلها بتحكي بقانون داخلي مصادق عليه من وزارة العمل.

بتعرف يا بلد الخوازيق يا بلدي العزيز .. أنا فقعت .. أسألك بالله اتطلع على حالي .. !! والله اني ماكل هوى .. كل يوم حرامي جديد كل يوم حرامي جديد .. وبدل ما تبلش بالحرامية بتبلش فيّة؟ ليش ليش يا بلدي؟ ليش حارمينك من ولاد الحلال؟؟ ليش حارمينك من البطانة الصالحه الي كل  صلاة جمعة بيدعي الشيخ اللهم وفق ملك البلاد وارزقه البطانة الصالحه؟؟  ليش يا وطني انك محروم  من ولاد الحلال؟

يا وطني ما بدنا الزمان يضل يعيد نفسه .. الأسماء فيك هي  هي مش راضية تتغير .. من يوم ما وعيت على الدنيا – انت عارفني صح؟ مش تكون نسيتني؟ انا المواطن يا بلدي الغالي -  بحكيلك اني من يوم ما وعيت ع الدنيا وانا بسمع بنفس أسامي الحرامية والسراقين فيك وكلهم ما شالله اصحاب مراتب، وسلطات، ونفوذ، وأملاك، واستثمارات، وعقارات، وأصحاب معالي وحضرات، ومش قابلين يتغيرو .. ليش طيب؟ ليش ملزقين؟ الحرامية مسيطرين ع كل شي ولما بيجي الشريف بتحلقله يا بلدي .. !!؟ وآآ أسفاه ع حالك يا بلدي!

يا وطني بكفيني ارتفاع مضلش مجال بالله عليك .. انا اكلت هوا يعني مش قادر اتحمل بصراحة .. بدك أسرق؟ بدك أنهب؟ بدك اعيش على قرش الحرام؟ بدك الناس توكل بعضها؟ يا وطني أرجوك كلي رجاء إلك .. انك تسمعني .. احنا مش حمل هالحمل .. والمواصلات صرنا نروح مشي من -  المحطة - لأم نوارة ..  هسه بدك اياني أروح من أم نوارة للجاردنز مشي؟ بالله عليك بترضاها؟

ويا ريت ما حد يجي يتفلسف و يقولي يا زلمة اسكت وقول الحمد لله ع نعمة الأمان الي انت عايش فيها بالأردن .. لأني بعرف اني عايش بأمان وبحمد الله ع الامان ليل نهار .. لكن "أمان  وميت من الجوع"؟  بنفعش حبيبي ..