بدك تعرف قيم وأخلاق ومبادئ وحقيقة بلد؟ شوف كيف شعبه بيسوق! اصلاح السائقين في الاردن

بدك تخلّي اللي عاليمين (أو عالشمال) يشد ويسرع؟ أعطي غماز! بدك تاكلك مسبّه ببلاش؟ زمر لواحد (أو وحده عشان بطلت تفرق البنت زي الشب) قرب عليك كتير أو كسر فجأة.. طبعا بيكسروا من غير غمّاز عشان أنت ما تسرع زي ما حكينا بتاني نقطة فوق. بدك تعرف كيف ممكن تستعمل سيارتك كأداة تهزأ فيها الناس؟ كون مستعجل كتير بغض النظر عن السبب وأعطي ضو عالي متقطع تلات مرات للي قدامك وشوف البريك اللي بيحكيلك (أنا جكِر وعقلي أردني). بدك تاكل مسبة عن طريق الفلاشر؟ أعطيها ضو عالي لمدة 30 ثانية وبتاكل بريك مفاجيء.. أنت هون بتعطيها غمّاز مرة يمين و مرة شمال بسرعة!

بدك تعرف شو القيمة الزمنية اللي أقل من الثانية؟ إتحرك أول ماتشوف الأشارة صارت خضرا.. بتسمع زامور اللي وراك في هاي اللحظة الزمنية اللي ما بعرف إسمها..

بدك تستعمل سيارتك كأداة لتزبيط البنات ونوع السيارة ما رح يلعب دور أبدا! أول ما تشوف بنت عجبتك وبدك تعاكسها.. إقرف أهلها وأنت بتقرب عليها كتير.. إكسر فجأة.. إمشي قدامها وإدعس بريك فجأة عشان تخبط فيك من ورا.. وإذا حاولت تتجاوز عنك سكّر عليها.. البنت رح تكون خافت كتير وعصبت كتير فأكيد رح تصف عاليمين وتنزل تعطيك رقم تلفونها وتقولك "واو شو زلمة قد حالك أنت!"..

نحكي جد هلأ.. السواقة فن واخلاق وزوق.. طريقة سواقتك بتعكس تربايتك.. بيئتك.. شخصيتك.. أدبك.. الشارع إلو حق عليك.. لما ترمي زبالة من الشباك أنت بتوسخ بلدك.. بتعب عامل وطن.. بتعكس صورة سلبية عنك وعن أهل بلدك وعن بلدك.. لما تسرع وتكسر شجرة أو عمود كهربا..

السواقة فيها تعامل مع الناس.. ما بينقص من كرامتك شي لما تمرق واحد.. ومابينقص من رجوليتك شي لما تكون ست بعمر أمك عم بتسوق على مهلها إذا بتطول بالك عليها من غير ما تسب عليها أو تعطيها سكتة قلبية.. ما في داعي للمدافشة بالسواقة.. الأزمة هي هي ورح توصل على بيتك تتغدى بالآخر.. الأكل ما رح يطير ولا رح يخلصوا أخوك الصغير أو اولادك.. وما بينقص من مصاريك شي إزا أستعملت الغماز عشان يعرف اللي بيقدر قيمة الغماز كيف يتعامل معك.. يمين؟ شمال؟ ما حدا بيضرب بالمندل ليحزر أنت وين رايح.. والغماز مش معناه "يللا نتسابق".. الغماز عشان تاخد إحتياطك وتوصل عالبيت بإقل خسائر مادية ونفسية ممكنة..

السيارة أداة تنقل بتسهل حياتك.. مش وسيلة إحتفال ولا تزبيط.. نجحت توجيهي؟ إتخرجت؟ مبروك.. إحتفل في الأماكن المخصصة للإحتفال.. والزامور للتنبيه في حالة إحتجت تستعملو.. مش وسيلة طرش وإزعاج.. والراديو لتستمتع بالموسيقى وتتسلى لتوصل للمكان اللي رايح عليه.. مش تسمع الجيران تو باك أو أبو وديع عالوحدة بالليل!

السواقة بالأردن صارت بتعّصب وبتنرفز وبتسم البدن... صرنا في الصيف وموسم سياحة ومغتربين.. الأزمة زادت.. والناس مش طايقة حالها خلقة.. قبل ما نطلب "ريفورم لجوردان" مش لازم نعمل "ريفورم / اصلاح" لحالنا أول؟؟ خلينا نبلّش بالسواقة!